ഇളം പൈതലെ രാരിരാരോ

വാനിലൊരായിരം  താരകങ്ങള്‍ 
താഴേയ്ക്ക് നോക്കുന്നു മോദമോടെ,
എന്മാറില്‍ ചാഞ്ഞുറങ്ങീടുമിളം 
പൈതലെ,  നിന്‍ മുഖം കാണുവാനായ് 

താലോലമാട്ടുന്നു   കുഞ്ഞുതെന്നല്‍,
താളം പിടിക്കുന്നു കിളികുലങ്ങള്‍ 
താരാട്ട് പാടിടാം ഞാനും ,എന്റെ 
താമരപ്പൂമുത്തെ രാരിരാരോ ...

ഇത്തിരി വെട്ടമായ് മിന്നിടുന്നു 
കൊച്ചുമിനുങ്ങുകള്‍ കൂട്ടമായി
ശാന്തമുറങ്ങു ,എന്‍ കണ്മണിയെ,
ജന്മസാഫല്യമാം പൊന്‍ കനിയെ ...

കണ്ണാ കണ്ണാ

ഈ പാട്ട് ഇവിടെ കേൾക്കാം
http://sweeetsongs.blogspot.hk/2013/09/blog-post.html

രചന .ലീല എം ചന്ദ്രൻ
സംഗീതം. ഡോ .എൻ  എസ്  പണിക്കർ
പാടിയത് . ലയ ശരത്

 

കണ്ണാ കണ്ണാ നീയുറങ്ങ് ,എന്റെ

കണ്മണിക്കുഞ്ഞേ നീയുറങ്ങ്

കണ്ണേ…പൊന്നേ…നീയുറങ്ങ്

കണ്ണും പൂട്ടി ചായുറങ്ങ്….

           
രാരിരാരോ രാരിരാരോ

രാരീരം…രാരീരം..രാരോ             

അമ്മിഞ്ഞപ്പാലൂറും നിൻ ചൊടിയിൽ

മന്ദസ്മിതവുമായ് നീയുറങ്ങ്

കണ്ണിമ പൂട്ടാതെ കാവലാളായ്

അച്ഛനുമമ്മയുമരികിലുണ്ട്…..

രാരിരാരോ രാരിരാരോ 

രാരീരം…രാരീരം..രാരോ

പൊന്നിൻ കിനാവുകൾ കണ്ടീടുവാൻ

പൊന്നുഷസന്ധ്യകൾ കണ്ടുണരാൻ

പാലൊളി തൂകും നിലാവു പോലെ

പാതി മിഴി പൂട്ടി നീയുറങ്ങ്. 

രാരിരാരോ രാരിരാരോ 

രാരീരം…രാരീരം..രാരോ

      

ലളിതഗാനം

ഈ    ഗാനം കേള്‍ക്കാന്‍   http://leelamchandran.blogspot.in/search/label/%E0%B4%B2%E0%B4%B3%E0%B4%BF%E0%B4%A4%E0%B4%97%E0%B4%BE%E0%B4%A8%E0%B4%82.
ക്ലിക്കുക.


രചന ലീല എം ചന്ദ്രന്‍

സംഗീതം .രമേഷ് നാരായണന്‍

പാടിയത് .വിദ്യാ ഖാലിദ്



മൂകമായ്......

************

മൂകമായ് പാടുമീ വിപഞ്ചിക

മോഹ മായ് തേടുമീ വിപഞ്ചിക..

മധുരമാം ഓര്‍മ്മയില്‍

ഇതളിട്ടു നില്‍ക്കുന്ന

ജീവരാഗമാണ് നീ.




മോഹങ്ങളകന്നോരീ തീരഭൂവില്‍

ആരെയോ കാത്തിരുന്നു

വരുമെന്നും വരില്ലെന്നും മൊഴിപാടി

ഒരുകിളി ഇതുവഴി പറന്നുപോയി




താളങ്ങള്‍ പിഴച്ചോരീ ശൂന്യ വേദിയില്‍

ഏകയായ് ഞാനിരുന്നു

കരയാനും ചിരിക്കാനും കഴിയാതെ

മലരുകള്‍ മധുമാസം മറന്നു പോയി

ഒരു നോക്ക് കാണുവാന്‍

നിന്നു ഞാന്‍ ചുറ്റമ്പലത്തിന്നരികില്‍  
താമരപ്പൂങ്കുളത്തിന്‍  കരയില്‍ 
ഈറനുടുത്തവള്‍ ആ വഴി എത്തുന്ന 
നേരം ,ഒരു നോക്ക് കാണുവാനായ് ....

(നിന്നു ഞാന്‍ ...

കാര്‍വര്‍ണ്ണ വേണിയില്‍ മാദക ഗന്ധവു-
മായവള്‍  ആ വഴി വന്നു ,
എന്തോ പറയുവാന്‍ നിന്നു ,പിന്നെ -
ഒന്നും പറയാതെ പോയി....

(നിന്നു ഞാന്‍ ...

എന്നന്തരംഗം  നിറയ്ക്കുമാ പുഞ്ചിരി 
എന്നിനിയൊന്നു  ഞാന്‍ കാണും ...?
എന്നനുരാഗ വിരാജിത സുന്ദരി,
എന്ന് നാമൊന്നായിത്തീരും...?
(നിന്നു ഞാന്‍ ...
.

ഇപ്പോഴും...

ശാരദവാനിലെ താരങ്ങളങ്ങിങ്ങു
കണ്ണുകള്‍ചിമ്മുമീ രാത്രി
പാലൊളിത്തിങ്കള്‍ക്കുടം വീണു പൂനിലാ-
പ്പാലൊഴുകുന്നൊരീ രാത്രീ

ആരോ ഒരാള്‍വരും കാലടിയൊച്ചയ്ക്കായ്‌
കാതോര്‍ത്തിരിക്കുന്നു..ഞാന്‍
മിഴി  പൂട്ടാതിരിക്കുന്നു...
(ശാരദവാനിലെ......)

ഉള്ളില്‍ ലഹരിയാര്‍ന്നുന്മാദമായ്‌ കിളി-
പഞ്ചമം പാടിയതില്ല
കളകള നാദമുയര്‍ത്തിയൊരു കാട്ടു-
ചോലയുമൊഴുകിയതില്ലാ.....
(ശാരദ വാനിലെ...)

ഉദയ സൂര്യന്‍ മല മുകളില്‍ കരേറുവ-
നിനിയും നേരമായില്ല,
പൂവിന്നിതളില്‍ തുഷാര ബിന്ദുക്കള്‍ വെണ്‍
മുത്തായി മാറിയതില്ല....
(ശാരദവാനിലെ...)


നീലക്കടല്‍ത്തിരമാലകള്‍ തീരത്തെ
വാരിപ്പുണര്‍ന്നതുമില്ല
ആഷാഡമേഘങ്ങള്‍ പൊന്നുഷ:സന്ധ്യയ്ക്കായ്‌
വര്‍ണ്ണങ്ങള്‍ചാലിച്ചതില്ല....

ആരോ ഒരാള്‍വരും കാലടിയൊച്ചയ്ക്കായ്‌
കാതോര്‍ത്തിരിക്കുന്നു..കണ്ണീര്‍ 
തോരാതിരിക്കുന്നു..... 
(ശാരദവാനിലെ...)

വെറുതെ..

കുയിലിണ കൂവുന്ന മധുരഗാനത്തിന്റെ
ലഹരിയില്‍ മുഴുകി ഞാന്‍ നില്‍ക്കേ ,
അതു നിന്റെയോര്‍മ്മത ന്നുയിരുണര്‍ത്തീടുന്നു
അനുരാഗ വിവശയാകുന്നു....ഞാന്‍
അനുരാഗ വിവശയാകുന്നു...


മദഭരവര്‍ഷമായ്‌  മലര്‍മണം പെയ്തൊരാ
പഴയപൂങ്കാവനത്തില്‍
ഒരു വര്‍ണ്ണശലഭമായ്‌ പ്പാറിപ്പറക്കുവാന്‍
ദാഹമുണരുന്നു ...നെഞ്ചില്‍
മോഹമുണരുന്നു.

                                     (കുയിലിണ കൂവുന്ന ........)

പുലര്‍മഞ്ഞു തൂകുമാ കുന്നിഞ്ചെരിവിലെ
തളിരിളം പുല്‍പ്പരപ്പില്‍
നിന്മാറില്‍ തലചായ്ച്ചിരുന്ന നിമിഷങ്ങള്‍
തിരികെ വിളിക്കുന്നു...എന്നെ
തിരികെ വിളിക്കുന്നു.

                              (കുയിലിണ കൂവുന്ന ........)


നിറമുള്ള സന്ധ്യയെ പുണരുന്ന സൂര്യന്റെ
കിരണങ്ങള്‍ മാഞ്ഞിടും മുന്‍പെ
ഇനിയുമാ തീരത്ത്‌  ചേര്‍ന്നൊന്നിരിക്കുവാന്‍
വെറുതെ കൊതിക്കുന്നു....ഞാന്‍
വെറുതെ കൊതിക്കുന്നു...

                                (കുയിലിണ കൂവുന്ന ........)

**********

മാലാഖ

ആരീരം രാരീരം രാരോ ...രാരീ
രാരീരം രാരീരം രാരോ.....

താരാപഥത്തിനും  അപ്പുറത്തുനിന്നും
താഴേയ്ക്കു വന്നൊരു മാലാഖ
താരാട്ട് കേള്‍ക്കാന്‍ കൊതിക്കുമെന്നുണ്ണിക്കായ്
താമരപ്പൂവൊന്നെറിഞ്ഞു  തന്നു

ആരീരം രാരീരം രാരോ ...രാരീ
 രാരീരം രാരീരം രാരോ.....
 
താമരപ്പൂവിന്നിതളുകള്‍ക്കുള്ളിലായ് 
മാണിക്യച്ചെപ്പൊന്നൊളിച്ചിരുന്നു
അച്ചെപ്പ്  മെല്ലെ  തുറന്നപ്പോള്‍ കേട്ടുഞാന്‍
മാലാഖ പാടും മധുര ഗാനം

ആരീരം രാരീരം രാരോ ...രാരീ
 രാരീരം രാരീരം രാരോ.....

മാലാഖ പാടും മധുര ഗാനം കേട്ട്
മാനത്തെ നക്ഷത്രം കണ്ണ് ചിമ്മി
എന്‍ മാറില്‍ ചാഞ്ഞു മയങ്ങുമെന്നുണ്ണിക്കായ്
തെന്നലുമാഗാനം ഏറ്റുപാടി

ആരീരം രാരീരം രാരോ ...രാരീ
 രാരീരം രാരീരം രാരോ.....